SmartSirk - Fagdag om sirkulærøkonomi og industriell innovasjon i Bryne
Korleis kan norsk produksjonsindustri bli meir berekraftig og samtidig auke konkurransekrafta si? Dette sentrale spørsmålet stod i fokus då prosjektet SmartSirk, leia av Vekstpartner AS, arrangerte fagdag i mars i år. I Høghuset på Bryne samla bedrifter, forskarar og fagfolk seg for å utforske og drøfte løysingar innan design for sirkulære forretningsmodellar, automatisering og smart produksjon.
Lokal industri i front
Aarbakke AS, som lokal SmartSirk-bedrift på Jæren, presenterte seg sjølve og dei konkrete problemstillingane dei arbeider med for å tileigne seg kunnskap om muleg teknologi og forretningsmodell for å kunne tilby utvida tenester til ein smartare og meir miljøvenleg produksjonsindustri.
Aarbakke: Frå eingangsbruk til sirkularitet
Aarbakke har ein av verdens mest avanserte teknologi når det kjem til CNC maskinering og sveising til produksjon av deler og komponentar, mest til oljebransjen. Verksemda har høg aktivitet og forbruk av verktøy, som t.d. fresane i CNC-maskinenene.
I dag er det mest vanleg at produksjonsbedrifter sender utslitte fresar til material-gjenvinning etter berre ein gangs bruk. Aarbakke sin eigen verktøyavdeling, Edge, har derimot re-slipt brukt verktøy for både å redusere kostnadar og auke sirkulariteten i eiga bedrift, men også gitt tilbodet til andre. No ønskjer dei å effektivisere denne re-slipings-prosessen ved hjelp av teknologi, og tilby tenesta til ein langt større kundemasse enn dei 150 kundane dei har pr dato.
Kunnskapsbaserte løysingar for framtida
Tidlegare forskingsprosjekt har vist at gjenbruk og oppgradering av produkt kan gi store besparingar – både økonomisk og med tanke på klimagassutslepp – samanlikna med produksjon med jomfrueleg råmateriale. Dette gir Aarbakke AS, og andre involverte aktørar, sterk motivasjon til å utvikle teknologi for å skape ny berekraftig aktivitet og nye arbeidsplassar ved å tilby re-slipingstenester.
For å realisere slike løysingar må mange praktiske, tekniske og forretningsmessige spørsmål besvarast. Dette omfattar alt frå optimalisering av slipeprosessen til logistikk og samarbeid med eksterne partnarar. Aarbakke AS står ikkje aleine i dette arbeidet – dei jobbar tett saman med Jærtek, Robotic Innovation, Vekstpartner, SINTEF, SNF og fleire andre partnarar i SmartSirk-prosjektet.
Vegen vidare
Dei neste 18 månadene vil dette arbeidet leggje eit solid kunnskapsgrunnlag for veloverveide beslutningar om korleis slike tenester kan organiserast og gjennomførast i praksis. Resultata vil ikkje berre vere relevante for Aarbakke AS, men for heile produksjonsindustrien som ønskjer å ta steget inn i ein meir sirkulær og berekraftig framtid.
Vi ser fram til å dele vidare innsikt og oppdateringar etter kvart som prosjektet utviklar seg.